మన ప్రగతి న్యూస్/ వైరా ప్రతినిధి:
ఏన్కూరు మండలం ఆరికాయలపాడు గ్రామంలో వరి కోతలు ముమ్మరంగా సాగుతున్నాయి. ఇటీవల కురిసిన వర్షాలతో ఇప్పటికే పంటకు నష్టం వాటిల్లుతుందనే ఆందోళనలో ఉన్న రైతులు, మళ్లీ వర్షాలు కురిస్తే చేతికొచ్చిన పంట కూడా దక్కదేమోనని భయాందోళన చెందుతున్నారు. దీంతో వాతావరణ పరిస్థితులను దృష్టిలో ఉంచుకొని పంటను త్వరగా ఇంటికి చేర్చుకునేందుకు ట్రాక్ మిషన్లతో రాత్రింబవళ్లు కోతలు చేపడుతున్నారు.ఆరుగాలం కష్టపడి సాగు చేసిన వరి పంట కోత దశకు చేరుకున్న సమయంలో అకాల వర్షాలు రైతులను కలవరపెడుతున్నాయి. పొలాల్లో పంట తడిసిపోవడం, ధాన్యం నాణ్యత దెబ్బతినడం, దిగుబడి తగ్గే ప్రమాదం ఉండటంతో రైతులు తీవ్ర ఆందోళన వ్యక్తం చేస్తున్నారు. ఒకవైపు వర్షభయం, మరోవైపు పంటను సురక్షితంగా ఇంటికి చేర్చుకోవాలనే ఆతృతతో యంత్రాల సాయంతో కోతలను వేగవంతం చేస్తున్నారు. ప్రకృతి అనుకూలించకపోతే పెట్టుబడులు కూడా చేతికి అందవేమోనని రైతులు ఆవేదన వ్యక్తం చేస్తున్నారు.
