నాచారం: ఉప్పల్ నియోజకవర్గ పరిధిలోని నాచారం బాబా నగర్‌లో ఉన్న దర్గా హజ్రత్ సయ్యద్ మహమ్మద్ షా వలీ సర్కార్ (రహ్మతుల్లాహి అలైహి) వార్షిక జష్న్-ఎ-ముబారక్, ఉర్సు వేడుకలు మంగళవారం భక్తిశ్రద్ధలతో ఘనంగా నిర్వహించారు. ఈ వేడుకలకు ఉప్పల్ ఎమ్మెల్యే బండారి లక్ష్మారెడ్డి ముఖ్య అతిథిగా హాజరై ప్రత్యేక ప్రార్థనల్లో పాల్గొన్నారు. దర్గాలో ఫాతేహా నిర్వహించి, చాదర్ సమర్పించి ప్రత్యేక దువాలు చేశారు.
ఈ సందర్భంగా ఎమ్మెల్యే బండారి లక్ష్మారెడ్డి మాట్లాడుతూ తెలంగాణ రాష్ట్రం గంగా జమునా తెహజీబ్‌కు ప్రతీకగా నిలుస్తోందని పేర్కొన్నారు. అన్ని మతాలు, కులాలకు చెందిన ప్రజలు పరస్పర గౌరవం, సోదరభావం, ఐక్యతతో జీవించడం సమాజానికి ఎంతో ముఖ్యమన్నారు. ఇలాంటి ఆధ్యాత్మిక కార్యక్రమాలు మతసామరస్యాన్ని, ఐక్యతను మరింత బలోపేతం చేస్తాయని తెలిపారు. ప్రతి ఒక్కరి జీవితాల్లో సుఖసంతోషాలు, ఆయురారోగ్యాలు, శాంతి, సౌభాగ్యాలు వెల్లివిరియాలని ఆకాంక్షించారు. ఈ కార్యక్రమంలో బీఆర్ఎస్ నాయకులు సాయి జెన్ శేఖర్, మేడల మల్లికార్జున్ గౌడ్, దర్గా నాయబ్ ముతవల్లి షేక్ అహ్మద్ ఖాద్రీ, ఫారూఖుల్లా సూఫీ సాహెబ్, దర్గా నిర్వాహకులు, స్థానిక పెద్దలు, భక్తులు తదితరులు పాల్గొన్నారు.
బాబా నగర్ దర్గాలో ఘనంగా వార్షిక ఉర్సు వేడుకలు ప్రత్యేక ప్రార్థనల్లో పాల్గొన్న ఉప్పల్ ఎమ్మెల్యే బండారి లక్ష్మారెడ్డి
