గోవింద నామస్మరణతో ఆత్మకూరు ఆధ్యాత్మిక సందడి
మన ప్రగతి న్యూస్/వనపర్తి/ ఆత్మకూర్:-
వనపర్తి జిల్లా ఆత్మకూరు పట్టణంలో శ్రీశ్రీశ్రీ కురుమూర్తి స్వామివారి బ్రహ్మోత్సవాలను పురస్కరించుకుని నిర్వహించిన స్వామివారి ఆభరణాల ఊరేగింపు కార్యక్రమం అంగరంగ వైభవంగా సాగింది. భక్తుల గోవింద నామస్మరణలు, మంగళవాయిద్యాలు, భజనలు, జయజయధ్వానాలతో ఆత్మకూరు పట్టణం ఆధ్యాత్మిక శోభను సంతరించుకుంది. స్వామివారి ఆభరణాల దర్శనం కోసం భక్తులు పెద్ద సంఖ్యలో తరలిరావడంతో పట్టణంలో పండుగ వాతావరణం నెలకొంది.పట్టణంలోని స్థానిక స్టేట్ బ్యాంక్ ఆఫ్ ఇండియా (ఎస్బీఐ) ప్రాంగణం నుంచి ప్రారంభమైన ఈ కార్యక్రమానికి ముందు స్వామివారి ఆభరణాలకు వేదమంత్రోచ్ఛారణల నడుమ ప్రత్యేక పూజలు నిర్వహించారు. తెలంగాణ రాష్ట్ర మంత్రి డాక్టర్ వాకిటి శ్రీహరి, దేవరకద్ర నియోజకవర్గ ఎమ్మెల్యే జి. మధుసూదన్ రెడ్డి, మాజీ ఎమ్మెల్యే చిట్టెం రామ్మోహన్ రెడ్డి తదితర ప్రముఖులు, ప్రజాప్రతినిధులు, రాజకీయ నాయకులు పాల్గొని స్వామివారికి ప్రత్యేక పూజలు చేశారు. ఈ సందర్భంగా స్వామివారి ఆశీస్సులతో ప్రజలందరూ సుఖసంతోషాలతో, ఆయురారోగ్యాలతో ఉండాలని ఆకాంక్షించారు.అనంతరం స్వామివారి ఆభరణాలను ప్రత్యేకంగా అలంకరించి భక్తుల గోవింద నామస్మరణల మధ్య ఊరేగింపుగా కురుమూర్తి దేవస్థానానికి తరలించారు. ఊరేగింపు ప్రారంభం నుంచి ముగింపు వరకు భక్తులు భక్తిపారవశ్యంతో గోవింద నామస్మరణ చేస్తూ స్వామివారిని కీర్తించారు. పట్టణంలోని ప్రధాన వీధుల గుండా సాగిన ఈ ఊరేగింపును తిలకించేందుకు మహిళలు, యువకులు, వృద్ధులు పెద్ద సంఖ్యలో తరలివచ్చారు. పలుచోట్ల భక్తులు స్వామివారి ఆభరణాలకు భక్తిపూర్వకంగా నమస్కరించి తమ మొక్కులు చెల్లించుకున్నారు.కురుమూర్తి స్వామివారి బ్రహ్మోత్సవాల్లో అత్యంత ప్రాధాన్యత కలిగిన ఆభరణాల ఊరేగింపు కార్యక్రమం భక్తుల హృదయాలను భక్తిభావంతో నింపింది. ప్రముఖులు, ప్రజాప్రతినిధులు, వివిధ పార్టీల నాయకులు, భక్తులు పెద్ద సంఖ్యలో పాల్గొనడంతో ఆత్మకూరు పట్టణమంతా గోవింద నామస్మరణతో మారుమోగింది. భక్తి, సంప్రదాయం, ఆధ్యాత్మికత కలగలిసిన ఈ వేడుక పట్టణ ప్రజలకు కనులపండువగా నిలిచింది.
