కేసు నమోదు చేసి దర్యాప్తు ప్రారంభించాం: సీఐ వీరప్రసాద్
వేములవాడ, నవంబర్ 14: వేములవాడ పట్టణంలోని ముదిరాజ్ వీధికి చెందిన వేముల శ్రీలత (35) అనే మహిళ ఆత్మహత్యకు పాల్పడిన ఘటన కలకలం రేపింది. ఆమె ఓ ప్రైవేట్ పాఠశాలలో ఉపాధ్యాయురాలిగా పనిచేస్తోంది. గత కొంతకాలంగా ఫోన్‌లో పరిచయమైన ఓ వ్యక్తి తన కోరిక తీర్చాలని, లేదంటే ఈ విషయం అందరికీ చెప్పి పరువు తీస్తానంటూ మానసికంగా వేధిస్తున్నట్లు పోలీసుల విచారణలో వెల్లడైంది. ఈ వేధింపులు భరించలేక నవంబర్ 13న సాయంత్రం 7 గంటల సమయంలో ఇంట్లో ఎవరూ లేని సమయంలో ఫ్యాన్‌కు చీరతో ఉరివేసుకుని ఆత్మహత్య చేసుకుంది. మృతురాలి భర్త ఉపాధి నిమిత్తం గల్ఫ్ దేశానికి వెళ్లగా, ఆమెకు ఇద్దరు కుమారులు ఉన్నారు. మృతురాలి తల్లి ఉప్పుల చంద్రమ్మ ఫిర్యాదు మేరకు కేసు నమోదు చేసి దర్యాప్తు ప్రారంభించినట్లు వేములవాడ పట్టణ ఇన్‌స్పెక్టర్ బి. వీరప్రసాద్ తెలిపారు.
