జూరాల గ్రామంలో అగ్నిప్రమాదం..
ఫైర్ ఇంజన్‌తో మంటలను అదుపులోకి తెచ్చిన అగ్నిమాపక సిబ్బంది
మన ప్రగతి న్యూస్/వనపర్తి/ఆత్మకూర్:-
వనపర్తి జిల్లా ఆత్మకూరు మండలం జూరాల గ్రామంలో బుధవారం విద్యుత్‌ షార్ట్సర్క్యూట్ కారణంగా అగ్నిప్రమాదం చోటుచేసుకుంది. గ్రామానికి చెందిన కురువ శివ ఇంట్లో ఫ్రిడ్జ్ నుంచి ఒక్కసారిగా మంటలు చెలరేగడంతో ఇంట్లోని వస్తువులకు ఆస్తినష్టం వాటిల్లింది. ఈ ఘటనతో కుటుంబ సభ్యులు భయాందోళనకు గురయ్యారు. సమాచారం అందుకున్న అగ్నిమాపక శాఖ అధికారులు వెంటనే ఫైర్ ఇంజన్‌తో సంఘటనా స్థలానికి చేరుకుని మంటలను అదుపులోకి తీసుకువచ్చారు. సకాలంలో అగ్నిమాపక సిబ్బంది స్పందించడంతో మంటలు మరింత వ్యాపించకుండా అడ్డుకట్ట పడింది. విద్యుత్‌ పరికరాల వినియోగంలో ప్రజలు అప్రమత్తంగా ఉండాలని, ప్రమాదాలు జరగకుండా తగిన జాగ్రత్తలు తీసుకోవాలని సూచిస్తున్నారు.