మన ప్రగతి న్యూస్/వనపర్తి/ఆత్మకూర్:
బడుగు బలహీన వర్గాల అభ్యున్నతికి విశేషంగా కృషి చేసి, సామాజిక సమానత్వం కోసం తన జీవితాన్ని అంకితం చేసిన మహనీయుడు, భారత మాజీ ఉప ప్రధానమంత్రి డాక్టర్ బాబు జగ్జీవన్ రామ్ విగ్రహ ఏర్పాటుకు మూలమల్ల గ్రామంలో సోమవారం ఘనంగా భూమి పూజ నిర్వహించారు.వనపర్తి జిల్లా ఆత్మకూరు మండలం మూలమల్ల గ్రామంలో ఏర్పాటు చేయనున్న డాక్టర్ బాబు జగ్జీవన్ రామ్ విగ్రహ నిర్మాణ పనులకు గ్రామ సర్పంచ్ జూరాల రంగారెడ్డి, ఉపసర్పంచ్ అశోక్ టెంకాయ కొట్టి శాస్త్రోక్తంగా భూమి పూజ చేశారు. ఈ సందర్భంగా మహనీయుడి సేవలను, సమాజానికి ఆయన అందించిన స్ఫూర్తిదాయకమైన సందేశాలను పలువురు గుర్తు చేసుకున్నారు.అణగారిన వర్గాల హక్కుల కోసం పోరాడిన మహానుభావుల విగ్రహాల ఏర్పాటు ద్వారా వారి ఆశయాలు, సేవలు భవిష్యత్ తరాలకు తెలియజేయవచ్చని గ్రామస్తులు అభిప్రాయపడ్డారు. డాక్టర్ బాబు జగ్జీవన్ రామ్ జీవితం నేటి యువతకు స్ఫూర్తిదాయకమని, సమానత్వం, సామాజిక న్యాయం, అణగారిన వర్గాల అభ్యున్నతి కోసం ఆయన చేసిన కృషి చిరస్మరణీయమని పేర్కొన్నారు.గ్రామంలో మహనీయుడి విగ్రహం ఏర్పాటు కానుండటంపై పలువురు హర్షం వ్యక్తం చేశారు. ఈ కార్యక్రమంలో డాక్టర్ బాబు జగ్జీవన్ రామ్ విగ్రహ ఏర్పాటు కమిటీ సభ్యులు, వివిధ వార్డుల సభ్యులు, గ్రామ నాయకులు, యువకులు, గ్రామస్తులు తదితరులు పాల్గొన్నారు.