తెలంగాణ డెస్క్: దీపావళి పండుగ వేళ హైదరాబాద్ నగరంలో వరుస అగ్నిప్రమాదాలు తీవ్ర ఆందోళనకు గురిచేశాయి. బాణసంచా పేలుళ్లతో నగరం సందడిగా ఉన్న సమయంలో పలు ప్రాంతాల్లో మంటలు చెలరేగడంతో ప్రజలు భయాందోళనకు గురయ్యారు. బేగంబజార్, కూకట్‌పల్లి, జీడిమెట్ల, మైలార్‌దేవ్‌పల్లి, సీతాఫల్‌మండి, కాటేదాన్ ప్రాంతాల్లో అగ్నిప్రమాద ఘటనలు చోటుచేసుకున్నాయి. ఈ ప్రమాదాల్లో ప్రాణనష్టం జరగకపోయినప్పటికీ లక్షల రూపాయల విలువైన ఆస్తి నష్టం జరిగినట్లు సమాచారం.
సికింద్రాబాద్ పరిధిలోని సీతాఫల్‌మండిలో చోటుచేసుకున్న ప్రమాదం స్థానికులను ఉలిక్కిపడేలా చేసింది. దీపావళి సందర్భంగా కాల్చిన ఓ రాకెట్ నేరుగా బాణసంచా దుకాణంలోకి దూసుకెళ్లింది. దీంతో దుకాణంలో నిల్వ ఉంచిన టపాసులు వరుసగా పేలడంతో ఒక్కసారిగా భారీగా మంటలు ఎగిసిపడ్డాయి. పేలుళ్ల శబ్దాలు, మంటల తీవ్రతతో పరిసర ప్రాంతాల్లోని ప్రజలు, వాహనదారులు భయంతో అక్కడి నుంచి పరుగులు తీశారు. సమాచారం అందుకున్న అగ్నిమాపక సిబ్బంది ఫైరింజన్లతో ఘటనా స్థలానికి చేరుకుని మంటలను అదుపులోకి తీసుకొచ్చారు.
కాటేదాన్ పారిశ్రామిక ప్రాంతంలో మరో భారీ అగ్నిప్రమాదం సంభవించింది. ఓ పరిశ్రమలో మొదలైన మంటలు క్షణాల్లో పక్కనే ఉన్న ప్లైవుడ్ పరిశ్రమకు వ్యాపించాయి. దట్టమైన నల్లటి పొగ పరిసర ప్రాంతాలను కమ్మేయడంతో స్థానికులు తీవ్ర ఇబ్బందులు ఎదుర్కొన్నారు. పొగ కారణంగా ఉక్కిరిబిక్కిరైన ప్రజలు ఇళ్ల నుంచి బయటకు పరుగులు తీశారు. మూడు ఫైరింజన్ల సహాయంతో అగ్నిమాపక సిబ్బంది మంటలను అదుపు చేసేందుకు చర్యలు చేపట్టారు. ఈ ఘటనలో భారీగా ఆస్తి నష్టం జరిగినట్లు సమాచారం. సంబంధిత పరిశ్రమలకు అవసరమైన అనుమతులు లేవన్న విషయాన్ని అధికారులు గుర్తించినట్లు తెలిసింది.
కూకట్‌పల్లిలోని ఆస్బెస్టాస్ కాలనీలోనూ అగ్నిప్రమాదం చోటుచేసుకుంది. పేపర్ టీ కప్పులు, ప్లేట్ల తయారీ కేంద్రంలో సోమవారం తెల్లవారుజామున మంటలు చెలరేగాయి. అక్కడి నుంచి మంటలు సమీపంలోని నెయ్యి, కుర్‌కురే, హల్దీరామ్ ఉత్పత్తుల నిల్వ గోదాములకు వ్యాపించాయి. గోదాముల్లో నిల్వ ఉన్న సరుకులకు మంటలు అంటుకోవడంతో పరిస్థితి ఆందోళనకరంగా మారింది. సమాచారం అందుకున్న అగ్నిమాపక సిబ్బంది సకాలంలో స్పందించి మంటలను అదుపులోకి తీసుకొచ్చారు. నగరంలోని ఇతర ప్రాంతాల్లోనూ అగ్నిప్రమాద ఘటనలు నమోదైనట్లు సమాచారం.
దీపావళి సందర్భంగా బాణసంచా వినియోగం పెరగడం, పరిశ్రమలు, గోదాముల్లో భద్రతా ప్రమాణాలపై నిర్లక్ష్యం వంటి అంశాలు ఈ తరహా ప్రమాదాల తీవ్రతను పెంచుతున్నాయి. ముఖ్యంగా జనావాసాలకు సమీపంలో ఉన్న పరిశ్రమలు, నిల్వ కేంద్రాల్లో అగ్నిమాపక పరికరాలు అందుబాటులో ఉండటం అత్యవసరం. బాణసంచా దుకాణాల వద్ద కూడా భద్రతా నిబంధనలు కచ్చితంగా అమలు చేయాల్సిన అవసరం ఉంది. పండుగ సంబరాల సమయంలో చిన్నపాటి నిర్లక్ష్యం కూడా భారీ ప్రమాదానికి దారితీస్తుందని హైదరాబాద్‌లో చోటుచేసుకున్న వరుస అగ్నిప్రమాదాలు మరోసారి హెచ్చరిస్తున్నాయి.