మన ప్రగతి న్యూస్/నర్సంపేట:
జ్ఞానానికి ప్రతీక అయిన పుస్తకాన్ని, చీకటిని తొలగించే వెలుగుకు ప్రతీకలైన దీపాలను అనుసంధానిస్తూ దీపావళి పండుగ సందర్భంగా నర్సంపేటలోని లీడ్ గ్రంథాలయంలో వినూత్నంగా అలంకరణ చేపట్టారు.పూలతో అందంగా తీర్చిదిద్దిన దీపం, పుస్తకం ఆకారాలు ప్రత్యేక ఆకర్షణగా నిలిచాయి. వాటి చుట్టూ వెలిగించిన ప్రమిదలు జ్ఞానజ్యోతిని, విద్యా వెలుగులను ప్రతిబింబించాయి. అజ్ఞానమనే చీకటిని తొలగించి విజ్ఞానమనే వెలుగును సమాజమంతా వ్యాపింపజేయడంలో పుస్తకాలు, గ్రంథాలయాల పాత్ర ఎంతటి గొప్పదో ఈ అలంకరణ చాటిచెప్పింది.
దీపావళి అంటే కేవలం దీపాలు వెలిగించే పండుగ మాత్రమే కాదని, ప్రతి ఒక్కరి జీవితంలో జ్ఞానదీపాన్ని వెలిగించుకోవాలని లీడ్ గ్రంథాలయం వ్యవస్థాపకులు కాసుల రవికుమార్, శోభారాణి
అన్నారు. వినూత్నంగా దీపావళి శుభాకాంక్షలు తెలిపిన వీరిని పలువురు అభినందించారు.
