- రెచ్చిపోతున్న మట్టిమాఫియా
- ప్రభుత్వ స్థలాల్లో యథేచ్ఛగా తవ్వకాలు
- పట్టించుకోని అధికారులు
- రఘునాథపల్లి మండలంలో సాగుతున్న దందా.!
మన ప్రగతి న్యూస్ /
రఘునాథపల్లి :
మట్టిమాఫియా రెచ్చిపోతోంది. కళ్లు మూసి తెరిచేలోపు గుట్టలను మాయం చేస్తోంది. అర్ధరాత్రి వేళ ప్రభుత్వ స్థలాల్లో యథేచ్ఛగా తవ్వకాలు జరుపుతుండటంతో నిన్న చూసిన గుట్ట నేటికి పంటచేనులా మారుతోంది. ఇంత జరుగుతున్నా అధికారులు నిమ్మకునీరెత్తినట్టు వ్యవహరిస్తుండటంతో మాఫియా ఆగడాలకు అంతులేకుండా పోతోందన్న విమర్శలు వెల్లువెత్తుతున్నాయి.మట్టి వ్యాపారం మూడు పువ్వులు.. ఆరు కాయలుగా సాగుతుండటంతో ఆ వ్యాపారం వైపు ఇటీవల చాలా మంది మక్కువ చూపుతున్నారు. అయితే పగటి వేళ అన్ని సమయాల్లో యంత్రాలు పెట్టి భారీ వాహనాలతో రవాణా చేస్తున్నారు. ఈ క్రమంలో రఘునాథపల్లిమండలంలోని గ్రామాల్లోని గుట్టలు మాయమవుతున్నా అధికారులు పట్టించుకోకపోవటం పట్ల తీవ్ర ఆరోపణలు వెల్లువెత్తుతున్నాయి. ఆయా ప్రాంతాల ప్రజలు అధికారుల దృష్టికి తీసుకెళ్లినా పట్టించుకోవటంలేదనే ఆరోపణలున్నాయి.
వాల్టా చట్టానికి తూట్లు..
ప్రభుత్వ గుట్టల్లో చిన్న పుల్లను కదిలించినా చట్ట ప్రకారం తప్పవుతుంది. కానీ ప్రస్తుతం ఈచట్టం కేవలం చట్టుబండగా మారిందన్న అభిప్రాయాలు వ్యక్తమవుతున్నాయి. కానీ మండలంలో ఎన్నో గుట్టలు రాత్రికి రాత్రి మాయం అవుతున్నా , చెట్లు నేలకొరుగుతున్నా అధికారులు ఎందుకు పట్టించుకోవటంలేదన్న విమర్శలు వినిపిస్తున్నాయి. ఇప్పటికైనా అధికారులు స్పందించి మట్టి మాఫియా ఆగడాలను అరికట్టాలని స్థానికులు డిమాండ్‌ చేస్తున్నారు.
